【一起走過「瘋」火大地】
無論有幾鍾意自己一個人去旅行，有時都好享受同朋友一同闖下世界，始終感覺係完全唔同。當然，我都唔例外，都捉過身邊人陪我一起走過「瘋」火大地。
此話何解？哈哈，同死黨去旅行除左唔怕呈現自己最醜、最無儀態既一面之外，我諗最開心既係即使去到異地，都可以一齊繼續瘋人瘋事瘋語瘋笑，難忘傻事一鑼鑼。
1. 來一口冬瓜茶
話說去台灣就一定要飲返杯冬瓜茶，三人行去到夜市就買杯1000ml既黎解下渴。當其中一位友人飲完一啖之後大叫「好正呀」，順手遞俾另一位試下個時，「砰」！成杯冬瓜茶擲地有聲咁趺左落地下，冬瓜茶四散。然後，你眼望我望，再望下距離買冬瓜茶不遠既鋪頭入面既職員，心諗會唔會睇到我地咁樣會好好咁免費俾多返我地。結果，當然無啦．．．其實，到而家都好似未能證實當日到底係邊個接住呢杯冬瓜茶，只係知道，就真係來一口冬瓜茶．．．
2. 男朋友駕到
去草原睇動物當然咩動物都有可能見到，但無諗過係動物園會見到自己男朋友。唔係見到，而係應該身處香港既男朋友突然駕到。三人行行過某個白兔園，友人突然向前指住並大嗌：「小X呀！」我同另一位朋友好疑惑咁諗你係咪思男朋友思到傻左，指住黑色既兔仔話係自己男朋友。點知再睇清楚D，原來隻小白兔個名同佢男朋友個花名都係一樣，叫「X白」，結果係點？女朋友當然要同男朋友當下倩影啦。
3. 頭文字D現實版
因要係吉隆坡轉機去檳城，加上凌晨時份要等成六個鐘左右，決定係機場留宿一晚。兩位人兄大安旨意諗住聽朝訓醒先施施然咁行去閘口登機，誰知訓到半路有個保安拍醒我地話呢度唔訓得。其實距離上機時間仲有唔夠兩個鐘，加上醒左後已經無睡意，就同朋友去搵下登機既閘口係邊。點知，橫掃咁大塊板都無我地班機既號碼，初時以為佢未更新資料，等左大概半個鐘左右再睇。點解都係無？！淆底感覺油然而生，即去問下職員。又點知．．．原來吉隆坡唔止得一個機場，而我地係要去另一個機場轉機，但距離上機時間仲有個半鐘左右！可以點，咪即刻搭的士趕去。一上到車就同司機講我地既情況，叫佢安全環境下開行turbo，佢又真係開到行！加上仲係好早，馬路上都無咩其他車，最後司機頭文字D上身，用左一半既時間就到左！當然，我地上到機啦．．．唔，諗返我地真係要多謝個保安。
4. 違失銀包記
平時出門自己其實會好小心，銀包會用另一個袋仔裝住，但意外真係意料之外。話說有晚檳城落好大雨，雨水大到浸過小腿，我地觀光完畢後拿拿淋返hostel。見到咁壯觀既場面手痕下就扲部電話出黎影相，就係呢一下，就改變左成晚！沖完涼出黎諗住扲個銀包出黎睇下仲有幾錢剩，咦，我個銀包呢？個下其實仲好鎮定，搵埋其他袋，無。再諗下最後係幾時見過個銀包，唔記得。不禁倒抽一口涼氣。行落去搵個友人，好明顯我係面如死灰，佢已經睇得出我有唔妥。雖然銀包裡面馬來西亞加香港幣唔係好多，但有張身分證係度，又雖然唔見左身分證都返到香港，但個下係會淆底的。好，冒住大雨出去搵下，問題係雨仲係咁大，水仲係浸到上小腿，真係睇唔到D咩．．．最後唔知點解會走左去間便利店，同職員講，如果見到某個樣既銀包，可唔可以幫我地留起，聽朝行過黎扲。當下已經無咩希望，返到hostel其他房客知道我呢件事都叫我節哀順變。又唔知點解有個人見到雨細小小去左個間便利店買野，又俾佢發現疑似係我銀包既物體keep左係職員度。最後，物歸原主，馬來西亞幣就無哂，好好既係佢俾返港幣同身分證我．．．朋友，只好對住我大笑。
瘋事可以講一日都講唔完，但預期聽我講不如同你朋友諗下一齊去邊度啦！
其實，一個人有一個人既浪漫，朋友之間亦有當中既歡樂。所有既回憶都會成為今日既話題。你又有無試過同朋友一起走過「瘋」火大地？
Blog：http://backpackersopoor.blogspot.hk/
Search